Alsharq News الشرق نيوز
مقالات مشابهة
حوار سوري سوري:
نور الدين الإسماعيل
أغلب مجموعات السوريين على واتس اب بتشهيك تكون سوري، نتيجة الحوار والنقاش الهادئ المتزن.
مثال:
– علي أرسل فيديو
– أحمد: مينو هاد الي متصدر في الفيديو؟
– علي: اشو قصدك متصدر يعني، أنا كذاب ولاك؟
– أحمد: ليش عبتقول ولاك؟
– علي: تطلع ستين ولاك، لكا أنا متصدر؟
– أحمد: أنا ما قلت عبتكذب قلت متصدر بعدين ماني عرفان أنك بالفيديو بلا صغرة.
– علي: أنت عبتتمسخر وتاريك واحد مانك محترم
(حسين الي متقاتل مع مرته وهالدقيقة فتح واتس اب): هدّوا يا شباب وصلوا عالنبي
– أحمد: أنا بعلّم عيلتك الاحترام
– علي: بتعلم طيـ…
– خالد: لاااااااااااااا هلق صار حكي عيب وين المشرف
– عباس: شباب بتعرفولنا وين في قشر رخيص هلق؟
– خالد: يا مشرفين تعالوا شوفوا اشو عبيحكي معنا بنات في المجموعة
– علي: وانت اشو دخلت
– خالد: دخلني ونص لأنك واحد قليل احترام
– علي: تأدب ولاك
– خالد: ولاك في راسك يا عرصا
– موسى: يا شباب لا حدا يغلط رجاء وين المشرفين
– علي: تفضل وهاي عبيسب كمان
– أحمد: قليل ذوق
– موسى: مين أنا؟
– علي: مين بتقصد، أنا؟
– خالد: مين قليل الذوق؟
– أدهم: خيو زكاتكن بتعرفولي وين بيبيعوا جنزير بسكليت؟
– علي: بدنا نعرف مين قليل الذوق
– رائد: هدوا هدوا هاد ماهو نقاش يا شباب رجاء وبلا غلط
– سليم: اشو صوت هالانفجار؟
– خالد: وين؟
– أدهم: وين؟
– علي: وين؟
– أحمد: وين الانفجار؟
– موسى: اشو في احكي؟
– سليم: ماش ماش طلع دولاب شاحنة..
– أدهم: مين قليل الذوق؟
– أحمد: الي ما بيحترم حاله قليل ذوق
– أدهم: أنت مانك محترم
– أحمد: لا تغلط ولاك
– أدهم: ولاك في راسك..
– أحمد: خرى عليك
– أدهم: خراس يا كلب
– سعيد: مين قطعت عنده الكهربا؟
– خالد: أنا
– علي: وأنا
– أحمد: أنا جاي
– أدهم: لوين جاي أي تعال بدي كسر راسك
– رامز: ولك قصده الكهرباااااااااااا جاي عنده مو جاي يقاتلك
– أدهم: أي أي ما انتبهت
– أحمد: أي بجي وبكسر راسك
– أدهم: تعال وشوف مين الي رح ينكسر راسه
– حسين: عبيقولوا بدهن يضربوا
– علي: مين بدو يضرب
– أدهم: لسى بدي كسر راسه
– حسين: لك بقصد النظام بدو يقصف يمكن
– مغترب في وطني: يا شباب يا مشرفين تعالوا شوفوا حدا يحكي ويضب الغرفة
– أحمد: قصدك نحنا فلتانين وبدنا حدا يضبنا؟
– مغترب في وطني: قصدي يضبط يضبط والله بس ما انكتب حرف الط
– علي: أي واحد زي احسانك بدو ضب يا أحمد لأنك فلتان
– الزير: يا لثارات كلييييييييييييييييييب
– جساس: فشرت يا عرصا
– ابن عباد: زكاتكن حدا يحكي مع عبدو خليه يفتح نت ضروري مرته مضيعة طريق البيت وراسها فاتل
– أبو الأسود الدؤلي: فضحته وفضحت مرته يا مالي العمى ما في داعي تفصّل
– ابن عباد: ايييي اشو قلنا…
– الأشعث بن أغبر: دعوني عليهم لأفرمنهم فرما…
–
يدخل المشرف بثوب الوقار مع زورة وهيبة، يصرخ بالجميع، ويقفل المجموعة ويعم الصمت ويعود كل واحد منهم إلى عمله.
بعد ساعة يفتح المشرف المجموعة ويبدأ حديث جديد ومشكلة جديدة وخصوم جدد ومخلصين جدد، وهكذا يستمر النقاش والحوار السوري البناء بكل جمال ولطف وأناقة.
