Alsharq News الشرق نيوز
مقالات مشابهة
مثرثرون !
بقلم أسد القصار
قدري جميل .. ايمتا بدنا نحط خلافاتنا جانباً ونساوي مؤتمر ونقبر هالفقر أنا وانتا ؟
مالك شايف العالم كيف عم تتحرك وتقص عملة واحنا بس عم نتذمر ونثرثر ؟! طيب عم نفرفر عفوا .. عم نثرثر ونثرثر تعا نعمل مؤتمر ونسميه ( مثرثرون ) ونسترزق !
والعدة وحياتك موجودة طاقية بيريه ولحشة حمرا وجاكيت بليزر بيج وشنتة جلد بنية ماحة وغليون قديم .
ووالله مارح تتكلف شغلة ٣٠٠ ورقة ( يورو ) اذا كتير تبهنكنها وعالنص علي وعليك
.. احلى صالة اجتماعات بكل زاكسن مع بروجكتر وبفل ومايكرفون ب١٠٠ يورو ، نص دزينة قناني كولا من الaldi ونص دزينة قناني مي ب١٠ والغدا من عند ابو خالد صندويشة شاورما عالماشي للراس .
وقائمة المدعويين زاهزة ..
شي عشرة من جماعتنا من زمان محطوطين عالرف وما حدا منتكشن صرلن ١١ سنة عم يعملو ماسنامة وما خلصوا اذا بتقلن مؤتمر رح يجو ركض ، وشيخ جامع وخوري واي شب او صبية دروز ( مشان الفسيفساء والديكور والذي منو ) وبعرف تنين ديناصورات ناصريين بكولن لساتن عايشين تصور ؟! كمان بنجيبن ، وبالنسبة لشيوخ العشائر بنلقطلنا تنين تلاتة من التيكتوك وبيجوا مع كامل العدة واللباس ..حاكم كل يوم يتجلالنا شيخ جديد تقول مفرخة صيصان مو هيك فخلينا نستفيد من هالمواهب بدل مالها مهدورة .
وفي واحد يا ابو القدور لقطة ..هون عنا بألمانيا كردي وشامي وصوفي واخونجي وخريج مدرسة كفتارو وبحب بن لادن ومن جماعة معاذ الخطيب وبالإئتلاف ومع قسد سوا شلون زبطت معو ما بعرف.. كمان هاد منجيبو
شوية شعارات عشوية خطب على خطة عمل خلبية وكم تصفيقة حلوة .. بدك تقول بالميتة بنطلعلنا ب١٠٠ الف ، حلوين
وبعدا بنرجع بنتخانق بس هالمرحلة يا رفيق مرحلة نصب بقصد مرحلة عمل ونضال وانتا سيد من ناضل سيد راسي
فكر وردلي خبر بس لا تتأخر رجاءاً .
