Alsharq News الشرق نيوز
مقالات مشابهة
طبق الحصار مطبقة_فجل
فادي شباط
نبذة عامة: يعود أصل هذا الطبق إلى منطقة جنوب دمشق خلال حصارها من قبل نظام الأسد مابين عامي ٢٠١٣ إلى ٢٠١٨
طريقة التحضير:
نُحضِر صينية كبيرة مشحرة ومطعوجة من جميع الجهات.
نغسل الصينية بالماء العكر نظراً لعدم وجود حنفيات الفيجة.
نكتنز ٢ كيلو فجل مفشوِل لأنه مافي فجل جيد.
نقطع أو نحز أو نفرم الفجل على شكل دوائر أو دويرات على حسب الرغبة، ثم نضع أول صف من الأسفل.
أما الصف الثاني: نحز أو نفرم أو نقطع الفجل على شكل دويرات أو دوائر على حسب الرغبة.
أما الصف الثالث: نفرم أو نقطع أو نحز الفجل على شكل دوائر أو دويرات على حسب الرغبة. ويجب أن لا يختلط فجل الصفوف مع بعضه حفاظاً على النكهة.
نرش على الوجه ماتيسر من الأعشاب والحشائش إن وجدت (كزبرة، بقدونس، نعنع، بقلة، حشيش، رجل العصفورة ، أي أي شي، مشان تطلع وجبة ذات قيمة غذائية متكاملة.
إذا إذا إذا.. يعني إذاااا وجدت ملح أو حمض الليمون رش عالوجه، إذا مالقيت لا ترش حسب الرغبة، إذا بدك لا ترش شوي، وإذا بدك لا ترش كتير ، لا ترش حسب الرغبة لأنه الطعم واحد لأنه موجود.
لا تحط بصل لأنه أساساً مافي بصل، والبصل مو منيح مع الفجل بخليك تبكي (زيت فرام) والفجل بخليك تعطس من تحت.
بعد وضع كافة المكونات: نشغل صوبية الحطب على ما تيسر من حطب وكوشوك وبلاستيك وقماش ونهبهب النار جيداً، ولا نحزن إذا دخنت البواري، مشان تطلع طبختنا مدخنة متل الفستق المدخن.
نضع الصينية على الصوبية ونزود النار بكل ما يشتعل، ونستمر بالنفخ حتى يطلع بلعنا، لأنه هالأكلة مو طيبة غير عالبلع الطالع والوجه المشحر.
إياكي سيدتي تحركي الطبخة مشان تحافظي على جمالها ولازم تطلع الفجلة أخت الفجلة، وما تتجعلك وتنتزع النكهة.
استمر بالطهي والنفخ حتى نفاذ كمية الحطب، يعني الصوبية أتوماتيك بتطفي لحالها.
وهيك بكون الطبق جاهز. وصحتين وعافية.
القيمة الغذائية: هذا الطبق غني بفيتامين الفجلين والحشيشين والشحوارين، ويساعد على إمتلاء المعدة وعدم قرقرتها.
