Alsharq News الشرق نيوز
مقالات مشابهة
نعاوة فراتية
أحمد الظاهر
ترانا يافرات بليل غربه
عجب مامر طارينا على بالك؟
خطر موجك على فكري وتعدى
ولا عند الهبوب علوم حالك
صفينا أرواح مبتلة بحزنها
حزن صفصاف متعود دلالك
أبد مافارگت وانت بخيالي
صفت بالروح بس مرت خيالك
ياحي الجاي واعلگت المواگد
تهللي وتعلگ الموگد خلاوي
تهرجنا على ونسة بربعتك
تبل أرواحنا وميتك تداوي
وأمان الله على جارك وضيفك
وعلى موحك سهرنا شگد رهاوي
أمانة اللهْ ياصفصاف گللي؟
هگوتي لسعك بالبرد خايف
أظنك تلتجي بطارف حويجة
وهگوتي الروج هو عليك عاكف
وعجب زل الفرات الچان حارس
حوايجنا ودغلها اليوم واگف؟
هين ياسرب الكراكي
أنچنت رايح
ودي كل دموعنا
وكثِّر ملايح
خبّر شطوط الفرات
شلون زورچ؟
شلون شاطيك الغفى بتعليله؟
خبِّر شموسو ببردنا
گللو مذبوحين
والذابح سعدنا
خبرو كل الدنيا خانت
والحياة صارت مصالح
خبرو ياسرب الكراكي
أنچنت رايح
ياضحوك الوجه
يابو زنود سمرا
ياليالي السّهرتنا
شلون گمرا
لاتخاف بليل أسود
ولا تخاف بريح صفرا
ياطويل البال
ياشط الفرات
ياعشگنا
من الولادة للممات
مايهم ايام غبره
ومايهم جروح نزفت
تعكِّر بروج المحبة
ومن دمانا تصير حمرا
