الأربعاء , ديسمبر 19 2018
الرئيسية / مقال / روبرت فيسك وتلميع آل الأسد

روبرت فيسك وتلميع آل الأسد

نجح نظام الأسد خلال سنوات حكمه من شراء مواقف عدد من الإعلاميين من دول أوربا وأمريكا لتلميع صورته خارجيا ولعل روبيرت فيسك أحد أبرز أولئك الإعلاميين الذي عمل على تلميع صورة الأسد الأب طيلة عقود من فترة حكمه ومن ثم إنتقل ولاؤه للإبن ، منذ إنطلاق الثورة السورية اصطف الصحفي البريطاني فيسك إلى جانب نظام الأسد رغم الإجرام والقتل الذي مارسه لكنه بقي على ذات الموقف من الدفاع عن نظام الأسد ، آخر تلك المواقف كانت الدفاع عن مجزرة الكيماوي التي حصلت في دوما والتي أنكرها فيسك حين زار أصدقاءه في دمشق معتبرا مايجري مؤامرة على نظام الأسد
في رسالة تهكمية على الفيس بوك يرد الصحفي اللبناني فداء عيتاني على روبرت فيسك وبلغة لبنانية مبسطة موضحا له تاريخ آل الأسد وتسلطهم على سوريا أرضا وشعبا

يقول فداء عيتاني
عزيزي الصحافي البريطاني المحترم.
طبعا ممنون جهدك بالنزلة على بلادنا ونحنا مش عارفين كيف عايشين فيها اصلا. بس بحب خبرك كم شغلة قبل ما تبلش تعطينا دروس وتعملنا تحقيقات تكشف المستور.
لما توصل عل دمشق الدولي، او اي معبر حدودي رح تلاقي صورة كبيرة لبشار الاسد.
لازم تخلي ببالك دائما انو هيدا الشب ورث الدولة السورية بامها وبيها من ابوه شخصيا، بعد ما خيو مات بحادث، لانو الورثة كانت من نصيب خيو، وبالصدفة طلعت الورثة من نصيبو.
بيو لهيدا الشب وصل على السلطة بانقلاب عسكري.
الانقلاب العسكري اللي عملو البي كان على الحزب الواحد الحاكم، يعني شي متل ١٩٤٨ لجورج اورويل، بس هيدا كان سنة ١٩٧٠، وطبعا تطورت المزرعة لصارت بهالشكل.
الشب نفسه وبيو وعمو عملو مجموعة من المجازر، الي صارت مكرسة.. كيف بدي فهمك ياها هيدي؟ يعني متل صبرا وشاتيلا اللي فخامتك نزلت وشفتها بعينك وعملت اسمك من ورا كشفها والتحقيق فيها، بس على ضرب شي الف. مرة بحماة مرة بحلب، هيدي كانت قبل صبرا وشاتيلا بسنة وحدة.
هيدا النظام اللي كتير جذاب بالنسبة الك، واللي ضباطو بيستقبلوك على المطار بالاحضان، وبيعرضو عليك تقعد مع معتقلين، هوي نفسه اللي تم اثبات عشرات المجازر عليه، بما في ذلك قتل معتقلين تحت التعذيب (بعشرات الالاف) وقصف قافلات انسانية للامم المتحدة والهلال الاحمر السوري (طبعا التابع للنظام نفسه، يعني النظام ما عندو مانع يقصف جماعتو اذا مدو ايد مساعدة انسانية لمناطق منكوبة، او بالاحرى نكبها هوي نفسه).
هيدا الشب مسؤول عن مجازر بالكيماوي، عددها تجاوز المئة، طبعا الاعلام عندك، وانت من اساطينو نشر عن كم وحدة متل مجزرة الغوطة الاولى وطنش عن الباقيين.
هيدا الشب، اللي عيونو زرق وبيعجبكم كتير، علماني وقت تشوفو من الغرب، بس اذا تطلعت عليه من الشرق بيكون طائفي علوي مذهبي متحالف مع ايران، واعوذ بالله انو يكون ايمانا منو بالحقائق المطلقة التي تدافع عنها الطائفة العلوية، وانما لضرورات الاستمرار بالسلطة.
هيدا الشب دمر سوري، وقبلها هوي وبيو دمروا لبنان مش لانو مزعوجين من الامبريالية العالمية وعم يحاولوا يخلوا الفتنة تنام، وانما لسبب واحد الحفاظ على الكرسي.
طبعا انت هودي ما بتحب تشوفهم، بعرف انك بتعرفهم منيح، بس ما الك مزاج، مدري ما عندك طاقة تفوت بكل هالبلغوصة، بتفضل انو تحكي عن مقاومة الامبريالية، واكاذيب الاسلاميين عن مجزرة الكيماوي، وكيف انو كلها هيدي تفنيصة وكانت البشرية ناطرة تحقيقاتك لتعرف انو كلها تركيبة والله يلعن الاسلاميين والخوذ البيضاء شو عم يلفقوا اكاذيب.
بس لو سمحت تاني مرة بتحب تزور سوريا انقبر (لا مواخذة) لا تعلمنا شو عم يصير عنا، مشكلتنا منعرفها منيح، اذا بتحب تتضامن روح بالاول شوف صور المقتولين تحت التعذيب، في متحف لصور سيزار، زوروا، بركي بيطلع معك شي فكرة تحقيق تضامني، ولا تعلمنا شو الصح وشو الغلط.
منعرف مصايبنا منيح، ومنعرف انو الدولة السورية والانظمة عنا بتسوى فجلة ورح نغيرها اليوم او بعد مية سنة.
لا تواخذني على الاطالة بس كان ضروري فهمك بالمبسط لانو واضح انك بتحب تستهبل.

شاهد أيضاً

حكومة نظام الأسد..بعد أكبر قرص شنكليش تخطط لإطلاق قمر صناعي

الشرق نيوز مايا درويش أثار تصريح وزير الاتصالات والتقانة في حكومة النظام إياد الخطيب ، …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

خمسة × 1 =